Rapport verneem onderhandelinge tussen die Suid-Afrikaanse Rugbyunie (Saru) en Erasmus se Ierse klubspan, Munster, om dié voormalige Bok-flank se terugkeer te bewerkstellig, is in ’n gevorderde stadium. Drie onberispelike bronne het aan Rapport gesê sy terugkeer is nou “ ’n blote formaliteit”.
Erasmus sal in sy vorige pos – as Saru se direkteur van rugby – aangestel word, skaars ’n jaar nadat hy skielik uit dié pos bedank het.
Die voormalige Cheetahs- en Stormers-afrigter het in April verlede jaar ’n aanbod aanvaar om hom as direkteur van rugby by Munster aan te sluit, te midde van gerugte van ’n uitval met Oregan Hoskins, Saru se afgesette president, en kort nadat Allister Coetzee as Bok-afrigter aangestel is.
Sou Erasmus terugkeer, sal hy na verneem word beheer hê oor die Bokke, die Junior Bokke, die Blitsbokke en die Suid-Afrikaanse skolespan.
In hoe ’n mate Erasmus by die Springbokke betrek sal word, is egter steeds duister – nadat Coetzee onlangs die valbyl oorleef het ná die Bokke se vrotsige 2016-toetsjaar.
Saru se aanvanklike plan, ná verlede jaar se mislukte toer na Europa, was om Erasmus in Coetzee se plek as hoofafrigter aan te stel.
Daardie onderhandelinge het egter ontspoor toe Saru se uitvoerende bestuur besluit het dat Coetzee se prestasiebeoordeling eers ná die drie toetse teen Frankryk kan geskied.
’n Finale besluit oor of hy (Coetzee) as Bok-afrigter sal aanbly, sal dus eers ná die reeks teen die Hane geneem word.
Die moontlikheid bestaan egter dat Erasmus by Coetzee kan oorneem, sou dié Kapenaar wel gepos word.
Erasmus se vertrek het verskeie turksvye vir die land se rugbybase opgelewer, insluitend die kontraktering van nasionale spelers, die aanstelling van die afrigtingspan van die Junior Bokke en die funksionering van Saru se hoëprestasie-eenheid, wat deur Erasmus op die been gebring is.
Laasgenoemde se agteruitgang was die rede waarom Jacques Nienaber, Erasmus se jare lange regterhand, en die skrumspesialis Pieter de Villiers koers gekies het.
Die voormalige Bok-losskakel Louis Koen moes hom gevolglik met administratiewe take bemoei, eerder as om die skoppers van die land se onderskeie nasionale spanne op die oefenveld te slyp.
Aan Rapport is gesê Erasmus sal eers sy verpligtinge vir die res van die seisoen by Munster nakom voordat hy terugkeer.
Yarpy Netwerk
